"Ande Bision"

by Isaac Maimon
The following vignettes, in Ladino, relating to the store most everyone knew as ‘24th Avenue Market’ describe some of the more humorous events during its early years.

En el anyo 1932, agora 64 anyos, Bension Maimon y Jack Funes mercaron la marketa en las 24 avenidas de Yesler Way. Vos creyesh ke solamente pagaron 200 dolares por toda la ropa y los bancos y tavlados. Yo tengo el documento de esta vendida en mi caza. El vendedor era un Japon.

Ningunas de las mujeres la yamavan a la butica ‘24th Avenue Market’. La yamavan "Ande Bision." "Va ir ande Bision." "Empleyi esto ande Bision."

Conectimos un telefon para ke mos yamen los mushteris y ke mos den un ordeno. Pero munchas vizinas ke no tenian telefon dizian "Bision, puedo uzar el telefon por un minuto?" Bension les dizia "Bash ustune." Kada una de estas mujeres tomavan mas de 15 minutos. Si avia alguna mushteria ke yamava al telefon y keriya dar un ordeno, la linya estava ocupada. Dishimos esto no va caminar y lo trokimos a ‘nickel’ phone.

Savesh lo ke es un tubeetch? 25 centavos. Tres tubeetches es 75 centavos. Una mujer yamo un dia, "Bision, a come es el cashcaval?" Disho Bension, "El cashcaval es a 65 centavos el paon." Disho la mujer, "Ayde, tres tubeetches ya te abasta." Le disho Bension, "65 centavos es mas barato de tres tubeetches."

"Bision, mandame un melon bueno, ke seya dulce. Mira ke tengo musafires." Akeya semana todos los melones estavan salyendo dulces. Al otro dia esta mujer yamo de muevo. "El melon ke me mandates ayer no estava bueno. Mandame otro uno."

Una mushteria encomendo un sako de arina de sien paones y una casha de azeite mazola ke era dos tenekes de cinco galones el uno. Esta mujer morava en la segunda tabaca, caji 20 escalones. Yo era el ‘delivery boy’ y suvi estos vente escalones con el sako de 100 paones de arina en el ombro. "Izak, la arina y el azeite los kero abasho en el basement." Todo atras abasho. Empesi a sudar ke me cansi muncho.

En cada anyo un ombre ke se yamava Leon Hanan mos mandava 50 paones de abudaraho de la California con la posta. Un anyo mos mando 100 paones. Era muncho. Yo tomi un papel grande y escrivi, ABUDARAHO y lo meti en la puerta para ke veyan todos. Dos Americanos, vizinos, entraron y se encorvaron y disheron ABUDARAHO, ABUDARAHO. Les paresyo ke era "Buenos Dias" en Japonesco.